Sot shënohen 25 vjet nga rënia heroike e Ridvan Qazimit – Komandant Lleshit, një prej figurave më të njohura dhe më të respektuara të rezistencës shqiptare në Luginën e Preshevës.

Komandant Lleshi mbetet simbol i sakrificës, qëndresës dhe përkushtimit për të drejtat e shqiptarëve në Preshevë, Bujanoc dhe Medvegjë. Ai ishte ndër komandantët kryesorë të Ushtrisë Çlirimtare për Preshevë, Medvegjë dhe Bujanoc (UÇPMB), duke luajtur rol të rëndësishëm në organizimin dhe drejtimin e rezistencës shqiptare në fillim të viteve 2000.

Përveç angazhimit në vijën e frontit, Ridvan Qazimi ishte edhe një nga përfaqësuesit kryesorë të shqiptarëve në procesin e negociatave me autoritetet serbe, ku kërkoi me vendosmëri barazi, të drejta dhe trajtim dinjitoz për shqiptarët e Luginës.

Ai ra heroikisht më 24 maj të vitit 2001 në fshatin Tërnoc, në një pritë të organizuar nga forcat serbe. Vdekja e tij tronditi opinionin shqiptar dhe u kthye në simbol të sakrificës për liri dhe mosnënshtrim ndaj padrejtësisë.

Edhe pas 25 vitesh, emri i Komandant Lleshit vazhdon të kujtohet me respekt të madh nga shqiptarët në Luginë dhe më gjerë, si një figurë që ia kushtoi jetën idealit kombëtar dhe mbrojtjes së dinjitetit të popullit shqiptar.

Lavdi jetës dhe veprës së Komandant Lleshit!