Një incident ka ndodhur sot në aeroportin e Splitit, ku një aeroplan i kompanisë Croatia Airlines ka dalë jashtë pistës gjatë procedurës së ngritjes.

Sipas informacioneve të para, aeroplani Airbus A220-300 me shenjën e regjistrimit 9A-CAN ishte planifikuar të realizonte fluturimin e rregullt ndërkombëtar OU412 në linjën Split – Frankfurt, por ngritja është ndërprerë për arsye ende të panjohura. Aeroplani ka përfunduar në sipërfaqen me bar pranë pistës.

Në aeroplan ndodheshin 130 pasagjerë dhe pesë anëtarë të ekuipazhit, përfshirë dy pilotë dhe tre anëtarë të stafit kabinor. Sipas Croatia Airlines, askush nuk është lënduar dhe të gjithë pasagjerët janë evakuuar në mënyrë të sigurt.

Nga kompania ajrore thanë se ekuipazhi ka vepruar sipas procedurave të sigurisë dhe ka ndalur aeroplanin me kohë. Pasagjerët aktualisht ndodhen në terminalin e aeroportit të Splitit, ku po marrin mbështetjen e nevojshme për vazhdimin e udhëtimit.

Croatia Airlines njoftoi se është në koordinim të vazhdueshëm me aeroportin e Splitit dhe autoritetet kompetente, ndërsa më shumë detaje do të publikohen pas përfundimit të hetimeve fillestare.